2018年4月3日星期二

瘋狂的磚頭 (三):一生三宅七千蚊


前言:一生三宅 = 7000人仔租金收入,笑死人咩?

買了自住樓翌年,筆者與豬媽媽的投資路上出現了另一個轉折點,就是豬媽媽認識了一位深圳樓老手。這位深圳樓老手過去十多年不停買賣深圳樓。當然,因為深圳樓市一直是大升市,他基本上每次買賣均賺錢。而且,他還有一個良好的經紀網絡,而且對法規十分熟識。更重要的是,這位老手十分喜歡睇樓,仲好熱心咁教我們這兩位深圳樓新手。

這位老手專攻深圳福田近香港的幾個屋苑,恰恰這幾個屋苑有些一房單位,當年入場費只是幾十萬至一百萬人仔,十分合適新手上路的筆者及豬媽媽。而且,租務回報居然有近4厘,管理費由租客負責,更甚者,跟香港不一樣,業主不用繳交物業稅及差餉。我們睇中的一個屋苑,跟福田關口車程不到10分鐘,未來還會建鐵路站 (現時已經開通了)。該高手還說:內地法例是保障業主,租客不交租,可以叫管理處換鎖,甚至可以將租客的家當全部掃出門口。”(當然,這只是高手之言,不要深究孰真孰假)

這位老手帶了筆者及豬媽媽去了該深圳屋苑前後兩趟。我們第二次上深圳已經看上了一個一房單位 (係無樓睇的),而且立即出了價。但,結果在簽約當日,業主話另一個合伙人不願賣,結果第一次買深圳樓就臨門脫腳。但豬媽媽沒有放棄,更於不久後單刀赴會,再一次在沒有見過單位真身的情況下,終於買下了另一個一房單位,成功晋身包租婆。

光速買了個單位之後,我們發現原來深圳樓攪港元按揭極之麻煩,而且我地只借幾十萬,很多行都不願借。因為新手上路,還是希望透過銀行上會,去確保交易沒有問題。最終,我們搵到一間細行,該行經理不太情願地俾我地上會,前題是要我們買一份保險。雖然自覺被昆了,我們還是買了保險,上了會。反而,業主俾我地幾十萬都要上會,仲要攪足一個月先上到會的舉措攪到大失預算,仲老羞成怒咁搵我地個經紀出氣。

由於豬媽媽的成功經驗,筆者在豬媽媽買入年半後,也再一次淘空腰包,買了一間比豬媽媽稍細一點的單位收租,也就在短短時間內由無殼蝸牛,變身業主,仲完成了坊間偉大的一生三宅夢想。但租金收入呢?哈哈!到今時今日,夾埋都唔夠7000人仔一個月。

後來,豬媽媽問筆者為何會咁熱衷去買多一間每月僅收得3000元不到的單位收租。筆者話:深圳容許每位港人買一間物業嘛。有QUOTA,又負擔得起咪買囉。而且,筆者相信深圳是中國的矽谷,也是全國增長最快的地區之一,甚至有能力長遠挑戰美國矽谷的全球IT中心的領導地位。沒有能力買得到深圳豪宅,至少HOLD住一兩間細單位,也至少可以搭上班順風車。結果買了後不足一年,深圳經歷了一年升一倍的瘋狂大升市。

事實上,豬媽媽已為每隔一段時間,要上去深圳攪租務的原因,跟筆者談過幾次要賣樓。筆者回覆是:賣了的錢用來做乜,難道給我用來買股票咩?一講到賣完樓筆錢用俾筆者買股票,豬媽媽就知都係磚頭絕對穩陣。因為輸哂,都仲有個地方遮頭。而,這個原因也是令我們仨能對磚頭一直持貨,只買不賣的原因。因為不買磚頭的另一個OPTION就是讓筆者買股票做大閘蟹。

8 則留言:

  1. 十幾年前, 樓市未癲...BABYKINGDOM 話買樓其中一個好處係:
    "等老公定時供樓, 鎖定佢D錢, 免佢攪攪震"

    而家又係另一故事了.

    回覆刪除
  2. 70後兄,唔好講笑,真係小富由供。起碼唔駛輸股票負回報,已經係功德無量。有位朋友同小弟一樣係股蟹,都係話好彩有供自住樓。有些大使的朋友都係因為供返層自住樓,所以至少仲儲到錢晌個單位度。不過,如果個個有師兄咁既身手同回報,應該無乜人會買樓。

    回覆刪除
  3. 十幾年前,沙士前後,我當年北上工作時深圳D樓係0首期免供添架,果時由無地鐵變到剛剛有一條線,果時每個站D站名既英名譯音都可以唔同架XD

    回覆刪除
    回覆
    1. 師兄原來又係高手。沙士果陣小弟仲係乜都唔識的靚仔。不過有聽高人講過,當年有好多簽個名唔駛首期,就肯賣俾港人的大貨盤,專門賣俾中港司機及內地工作的港人。今日深圳地鐵都N條線了,仲連到去東莞同惠州了。

      刪除
  4. 請問本人想買入深圳樓,作退休之用?請問邊度途徑了解會比較好呢?唔該哂,新手

    回覆刪除
    回覆
    1. 如果是完全新手,之前有博友推介《唐山大亨價值投資──解構大灣區房地產》。書中好似有一章講新手上路所需資訊。不過,請知悉內地政策是日日變的,所以任何資訊僅屬參考。

      話說回頭,如果閣下在本港未有住宅物業,小弟覺得還是在本港買自住樓是較為穩妥的決定。畢竟隔山買牛,又不熟法規,好易領野。買自住"二手"樓的話,就算跌,仲有得住。買一手嘛,近年跑輸比率極高。

      絕對建議先睇敝文:瘋狂的磚頭 (六):大牛市,輸身家?

      刪除
    2. 想了解大陸樓, 一定要自己返去睇情況 !

      刪除
    3. 對呀!睇多些樓,同最好有相熟經紀。

      刪除

悶文觀止

井底嘩 (七):零息負息無限QE就在眼前 / 我們只是代人付鈔的水魚! (筆者推介)

這篇文章旨在回應懶師姐在其主場召喚筆者,要求確認環球資產價格暴漲的原因是QE。由於這個學術問題,並非一兩句就能解答,筆者在本博另文回覆。 很多人以為 QE 是環球資產價格暴漲的根本原因。這個推演表面上是正確,因為資產價格只是貨幣現象。 貨幣濫發,必然會導致以貨幣計價 ...